"జల్, జంగిల్, జమీన్" నినాదంతో నిజాం నిరంకుశ పాలనకు వ్యతిరేకంగా, ఆదివాసీల ఆత్మగౌరవం కోసం ప్రాణాలర్పించిన మహానాయకుడు, గిరిజన పోరాట యోధుడు కొమురం భీమ్ 86వ వర్ధంతి వేడుకలను సోమవారం నిర్మల్ జిల్లా కేంద్రంలో ఘనంగా నిర్వహించారు. ఆదివాసీ గిరిజన సంఘం ఆధ్వర్యంలో జరిగిన ఈ కార్యక్రమానికి స్థానిక ప్రజలు, నాయకులు పెద్ద సంఖ్యలో తరలివచ్చారు. ఈ సందర్భంగా నిర్మల్ పట్టణంలోని చైన్ గేట్ సమీపంలో ఉన్న కొమురం భీమ్ విగ్రహానికి పూలమాలలు వేసి ఘన నివాళులర్పించారు. అడవి బిడ్డల హక్కుల పరిరక్షణ కోసం, స్వయం పాలన కోసం భీమ్ చేసిన చారిత్రాత్మక పోరాటాన్ని వక్తలు ఈ సందర్భంగా గుర్తుచేసుకున్నారు. ఆయన అడుగుజాడల్లో నడుస్తూ, ఆదివాసీల సర్వతోముఖాభివృద్ధికి, ఆశయాల సాధనకు ప్రతి ఒక్కరూ ఐక్యంగా కృషి చేయాలని ఈ వేదికగా పిలుపునిచ్చారు.